愉快好味的一個晚上 @ Greyhound Cafe

❝人生，有什麼能比得上和一班朋友相聚來得更滿足呢？❞

上星期剛好有機會相約了一班好耐冇見嘅朋友食飯，

旺角新世紀廣場Greyhound Cafe 係第一次光顧，以往常喜歡去又一城分店Lunch，

今次正好可以品嘗到晚餐嘅菜色。

我哋5個女仔分別點左幾款前菜及主菜share 食，我最喜歡睇有圖嘅menu 㗎啦，唔洗估估下。

上菜前飲啖茶先啦，呢杯 "藍蘭豆甜菊茶" 係朋友推介，

藍色嘅花茶帶有甘菊茶嘅味道，口味甘香不太苦澀，

或可放蜜糖一同飲用，茶即變成紫藍色，味道都會有唔同，

由甘香變為清甜嘅菊花口味，一茶兩飲好有趣架。

話咁快就上菜啦，呢度上菜都幾有效率。話咁快就全枱都係嘢食啦。

"大蝦牛油果沙律"
鋪住我最喜歡嘅牛油果同火箭菜，帶有點wasabi 豉油嘅沙律醬，呢種配搭都係第一次品嘗，好特別，下次食要記得拌勻啲，咁底個啲菜就唔咁咸啦。

"薄切三文魚配泰式辣汁"
呢個係朋友食過指點encore 嘅，特別之處係煙三文魚配左平常食生蝦個醬，原來味道都可以咁夾。平時食生蝦我頂多都係食到一兩件，因為受唔住個辣，不過呢個醬嘅辣味好容易接受，辣味唔會停留係個口太耐，仲會越食越上引添！

"秘製辣肉醬手包粉卷"
生菜包，我至愛！其實任何包下包下嘅嘢食我都好喜歡架。

生菜、分皮、肉燥仲有香蒜汁，好野味清新。 

粉皮嘅作用可以墊住肉汁，食嘅時候唔會咁易滲透，非常聰明嘅做法！

香蒜汁嘅辛辣味道剛剛好，一口咬下去，先係肉燥嘅香再來刺激嘅辛辣感覺，再咬落去生菜嘅清新會慢慢中和香蒜汁嘅辛辣味，好有encore 嘅意慾呀。

來到Greyhound 又點可以唔點佢嘅 “鮮蝦炒金邊粉“ 呢，

呢個係我平常去泰國餐館都必點嘅菜。呢度嘅炒金邊粉嘅乾濕度剛剛好，輕輕黏身得黎又唔會痴埋一舊舊，每條都上到個汁，炒得真係好好味呀！

呢度嘅主菜分量每碟都唔係好多，以炒金邊粉為例，如我地5個女仔share 食，一道菜分5小碗係剛剛好嘅。

最後不得不提甜品！！泰式甜品嘅一哥芒果糯米飯搖身一變成為杯裝嘅 “芒果芭菲“。

先解說一下，最上層嘅係冰凍椰汁雪芭，中間放有新鮮芒果，最底層即是暖暖嘅糯米飯 。

食嘅時候最緊要係一口食足三層，當椰汁雪芭開始融化時，雪芭就慢慢流向下層，

令芒果及糯米飯都能均勻地沾到椰汁香味，整個甜品味道更融和，另一種味覺嘅感受。

另店內環境整潔，地方闊落坐位多但唔密，侍應服務亦都很體貼，不時會留意幫我哋嘅茶加水，又會自動送上濕紙巾，真係一讚！下次要帶老公黎先！

Greyhound Cafe

旺角太子道西193號新世紀廣場3樓301至302號舖

-----------------------------------------------------

Gi - Life is Beautiful

wengichow@gmail.com

https://www.facebook.com/gichowengi

http://weshare.hk/WengiChow/

-----------------------------------------------------