星期三, 6月 18, 2014

沖繩6日5夜蜜月自駕之旅 ❦ Day 3 殘岥岬 + 美國村

Its an other month… the 3rd trip journal is finally done……

終於黎到遊記Day 3 啦！！真係過左好耐啦… 

2013.10.12
Day 3 - 殘岥岬，美國村
Goodbye 那霸市，BIRTHDAY 自駕北上起動!!!!!


今日係我生日，其實玩到自己已經唔記得左。王生第一份送比我嘅禮物就係… 情侶裝，嘩，真係人生第一次！個人黎講，咁樣嘅情侶裝已經係我嘅極限啦！


8點幾就起左身，打左去OTS，麻煩佢地早啲黎接我地去攞車。本身book 左12 點，打到去客務佢地好樂意改時間，仲好有禮貌咁問半小時後黎到得唔得，嘩，緊係得啦，感動流涕！！


司機叔叔帶左我地去DFS 攞車，OTS 取車點其實家有好幾個，機場嘅最大，另一點就係近市區啲嘅免稅站，就近おもろまち駅，坐Yui Rail 去都好方便。


取車四寶，護照，車牌，國際駕駛證同 Retail Voucher，之後嘅動作就係排隊... 10點去到，12點先攞到車，等到我傻。登記好仲要去等攞車，冇特別request 要英文GPS，不過第一次租車，都係搵返個識英文嘅staff 講解好啲，所以等左好耐... 但到最後，幫我地嘅先生其實都唔多識英文嘅。


出發！大大話都成8年冇開車，返左黎HK 都小開過一次，但係開車就如與生俱來嘅能力，一黎就自動球，真順暢！！
GPS 其實都超易用，OTS 先生先 demostrate 了一次，聰明的香港人一定很快學懂，記得事先抄底目的地嘅電話號碼。


第一站，必去景點殘岥岬，沿路可先經過幾個Chapel, 不過大多唔俾影相 (離遠影都唔係高興) 所以禮貌地，我地只觀光，相都冇影lu…

被趕前影下的唯一一張…


今日天氣麻麻，雲厚天暗無太陽，來到殘岥岬卻攝出另一種味道… 有點憂怨，有點Blue，有啲浪漫！





風很大，我地就坐係崖邊撲風睇浪，淺談趣事，相擁呢一刻的寧靜、只屬我倆的時間。



風很大




追完風，我地就去到恩納，由殘岥岬黎到車程45分鐘，入住全沖繩最有名嘅酒店ANA InterContinental，人生一次honeymoon 住豪啲啦！


呢度出名在於佢有一個好靚嘅Chapel，本身諗住旅行結婚係呢度攪，不過最後慳家妹性格黎出黎啦，錢都係留返比自已食左佢玩左佢算啦！呢度真係有好多人攪婚禮，差唔多一日幾對。我地入住酒店就可以係Chapel 門口影相，只係exclusive for 住客架咋。


玩左成個下午肚餓到爆炸，求其係酒店食左個好普通嘅貴tea 就入房欣賞下先。豪華大房超舒服，房內環境實際比相靚好多架，一入到黎就有一個relax 渡假感覺。


有啲令人失望的HONEYMOON 禮物… 不過送食嘅總好過送啲唔等洗又唔環保嘅嘢嘅！



房外環境，對住Chapel 架




恩納Beach，啲水清到好想一下跳入去呀，呢幾日一見到beach 就好似有幻聽咁，每分鐘都覺得個海係度呼喚緊我！


日落前，我地黎到美國村，開車返轉頭去到沖繩中部，慶祝我的生日。


美國村的感覺真的比較似外地，外國人很多，有個大Aeon 同ZEGA，其他商場的style 也似外國的local mall 仔，入面都有好多自家品牌店。


數到餐廳就不得不提呢一家用巴士車身作dinning area 嘅餐廳，好多旅遊書都有推介架… 不過因為尋日先食完pasta, 今次我地就冇揀呢家啦…


黎到美國村又點可以唔影下摩天輪呢… 影呢一set 相開心到我傻左，王生同我一齊癲，真幸福！






不經不覺已經入夜，玩到唔知時間啲兩個人，本來想食美國村signature dish Rico taco，點知我地玩得過左時間，7點幾，幾間店都已經坐滿人，所以來到呢家Deport Garden Cafe，唔係旅遊書住打，不過味道都唔差架！


花茶，有療效menu 的，我嘅係排毒Rose tea，王生飲嘅係清新消膩嘅LemonGrass peppermint tea.


呢家cafe 主要菜式就係漢堡扒，味道其實都唔錯架，而個汁亦都夠特別，但奈於我地唔識日文，真係估唔到個汁入面有啲咩，總之，佢比起一般Gravy 多左一位肉味，咁香滑但係竟然taste 唔到奶油味，真係好特式架。


Dinner 後我地就返酒會睇電視，估唔到老公静雞雞係deport garden cafe 買左件cake 同我慶生，沖完涼出黎就有cake 食！哈哈哈… 好在眼圈都唔算勁姐！


紅色蠟燭真係好攪鬼！配合返萬聖節主題嘅南瓜日式芝士蛋糕，雖然味道只算一般，但開心就贏晒啦！What a great Happy Birthday!!


----------------------------------------------
Follow Me on Gi C Life
wengichow@gmail.com

Instagram


----------------------------------------------
於 沒有留言:
標籤： ,

星期三, 6月 11, 2014

唔化妝都會用的卸妝物 Faith in Face All-Lighty Oil Cleansing Oil

估下我每日放工返到屋企最期待嘅事會係乜？望見到王生？錯了，洗好個面比見王生一面更重要！

每日都要化妝返工，條街又焗又污糟，面上毛孔堆積左嘅油脂污穢真係難以想像，佢地留多一秒，我嘅皮膚就會變差多一分。
要徹底卸妝，一支好嘅卸妝油又點少得！


最近試上 Faith in Face 嘅新寶貝 All-Lighty Oil Cleansing Oil，故名思義，佢係一支有去油功能而又輕爽嘅卸妝油。
阿Gi 明明就是乾皮膚，點解都用去油產品呢？


一般護膚建議乾皮膚唔好用去油產品，但因為我地生活係污染度極高嘅城市，天氣又熱又焗，面上產生嘅油脂就成了污垢細菌嘅安居，所以卸妝潔面時必須徹底清除油脂，潔面後再補水滋潤肌膚。



Faith in Face All-Lighty Oil Cleansing Oil 質感輕，比一般卸妝油天透薄清爽。性質温和不刺激，有效去除面上污垢及雜質，用後皮膚回復清爽光澤，不帶來油膩負擔。

先塗抹係彩妝上加圈，見到彩妝開始浮離皮膚，再加少少暖水乳化，彩妝即時被卸妝油融開，再沖洗就乾整晒！


特別想推介All-Lighty Oil Cleansing Oil嘅原因，雖然佢係去油產品，但一啲都唔乾，潔面卸妝有杰出表現之餘，清潔後皮膚上暗暗地留有一點滋潤感覺，肌膚瞬間回復清新平衡感覺。


就算用黎卸妝簡單眼妝都冇難度，卸妝油仲要唔那眼架！


日常上班嘅簡單妝，用温和嘅卸妝油洗面就足夠，卸得淨之餘亦唔會帶比皮膚多餘負擔丫麻。
圖右係卸妝後嘅情況，油脂污垢都洗走晒，有返啲即時光澤咁，水油平衡返，日間受到嘅敏感情況都的以舒緩啦。


想要一支清爽温和徹底卸妝嘅產品？我推介Faith in Face All-Lighty Oil Cleansing Oil。



----------------------------------------------
Gi - Life is Beautiful
wengichow@gmail.com
https://www.facebook.com/gichowengi
http://weshare.hk/WengiChow/
----------------------------------------------

於 沒有留言:
標籤：

星期三, 6月 04, 2014

[Gi Kitchen] 鬆軟吞拿魚包

手工包功夫多，不過就帶來莫大的成功感。
利用麵包機，我更可以省了打麵團的時間。
只要將材料放入麵包機，選擇 dough 功能，一個多小時返麵團就ready 啦！

經我多次嘗試多次失敗後，終於研究出呢個健康低卡recipe，少糖少油，就算冇加奶都一樣咁鬆軟架！

---------------------------------------
吞拿魚包材料：
高筋麵粉   250g
水+蛋         140g (可因應天氣+/-10g，今日有少少潮濕，所以分量減左少少嘅)
牛油           25g
糖               20g
鹽               3g
酵母           4g

鹽水浸吞拿魚    1小罐
蛋黃沙律醬        少量 (因應口味啦，不過想健康就唔好用太多啦)
----------------------------------------


麵包機響過後，先手測麵團嘅發酵度，手指沾上手粉插入麵團，只要不沾手，不太回彈就可以了，若然發酵度未夠，可多待15分鐘。

麵包機有發熱功能，可控制麵團於或一温度下發酵，家做麵包時就方便更多。
麵團做好後，平均分為8分，用磅量更準。
摺圓放好鬆持15分鐘。


放鬆後就是造型的時候，可以包餡啦，將面團壓平，料放中間，包起，收口向下，放到焗盤上，待20分鐘作最後一輪發酵。 (今次無將過程記碌底，下一次再做就會加返啲steps 架啦)

麵包的鬆軟度就取決於最後一次的發酵度是否足夠，温度、濕度都會有好大影響。建議利用焗爐的空間，先放一碗熱水增加焗爐中的濕度及温度，並一同發酵，麵包出來就會非常鬆軟啦。


發酵前後就係呢個樣，神奇吧！


終於ready 焗包啦，150度焗25分鐘，最後5分鐘調至180度加色。想麵包出來令立立，可以打一層雞漿，我呢個健康recipe，於決定唔加喇。


出爐！冇塗蛋漿都唔太失禮丫！



新鮮烘焗，包面脆卜卜，麵包鬆軟，彈力十足！ 不過包餡呢方面我就要再加油練習啦。


氣泡窿窿夠多，彈力夠，撕開會有麵包絲的，就係大成功啦！



凍左都一樣咁好味，因為食譜冇加奶同蛋，所以凍左會鞋少少，不過叮10秒返熱就會軟熟返晒。好好味！連唔食早餐嘅王生都咁棒場，就知道呢個健康吞拿魚包有幾好味啦！


好味嘢=唔健康？ 都唔係必然嘅！


-----------------------------------------------------
Gi - Life is Beautiful
wengichow@gmail.com
https://www.facebook.com/gichowengi
-----------------------------------------------------

於 沒有留言:
標籤：

星期二, 6月 03, 2014

相片共享樂 Transcend WifiSD Card

都係Staice 唔好，成日誘我買佢嗰部WIFI Camera，仲要喺我婚禮上幫我影靚相即放上FB (下圖)，衰嘢。

冇啦，我呢啲慳家精，相機唔到打晒柴都唔會考慮換部新嘅，唯有搵另一個方法啦！


以前用過好多方法去將相機嘅相即時Sync上手機，如，用SD card adapter，將memory save 係 mini SD，每次影完相就抽返出卡出黎換入手機入面。但呢個方法太麻煩，加上依家嘅手機都係內置 memory 嘅，所以… 唔work lu。


Research 完一輪，最終決定左買WIFI SD先，今次有花太多唇舌王生就買左比我lu，嘻嘻。本來諗住買Toshiba，不過百老滙哥哥話我部相機太舊，Toshiba 張卡唔支援嘅，所以佢推介左 Transcend 比我，用法都好簡單架咋。

首先，係 Play Store download 左個 APP 裝左落手機先。


之後就Follow Instruction 上嘅指示，將手機WIFI 同 SD 卡連接，同Set password，記得插卡後要開相機呀！


Link 好 WIFI，就可以開始用啦，等我幫啲小寶貝影張合照先!


影好就可以首試 Share 相啦，先make sure 相機WIFI 已連接，之後就可以打開先前 download 嘅 WIFISD APP。選擇 Browse


手機會即時browse SD card 上嘅記憶同preview thumbnail，見到張相啦！



打開後，preview 相嘅左下方會有個箭咀制，按下即下載!



一張1mb嘅相大約用1秒就能完成下載。


Gallery 位置會出現新folder， 相就係存左喺呢度啦！



方便又簡單，依家用相機影相都可以即時share 分享，仲可以即時用手機拼圖或 backup 上 drop box 添。
仲可以批次下載添，工作或去旅行時就用得著啦，真係方便好多呀！
多謝老公先!!!!

Transcend WIFI SD 
HK$420
購自: 百老匯
----------------------------------------------
Gi - Life is Beautiful
wengichow@gmail.com
https://www.facebook.com/gichowengi
http://weshare.hk/WengiChow/
----------------------------------------------

於 沒有留言:
標籤：
訂閱： 文章 (Atom)

LinkWithin

Related Posts Plugin for WordPress, Blogger...