G for Gi

星期二, 8月 25, 2015

衝著生蠔而來的一餐【The Luxe Seafood Bar & Resto】

阿Gi出名雀仔肚，次次去親自助餐都係蝕本收場，今日我終於都為番本啦！！

好耐都冇同妹食飯，今日一於食餐好嘅。但次次都要佢就我食得少食得清，我都唔好意思啦，今日一於平平地去The Luxe 食個自助晚餐。

點平法？$238 生蠔魚生任食，你話抵唔抵先！

任食生蠔吧！基本上一出就清架啦，影呢張相都唔知講咗幾多次唔好意思 😝

抵食都要睇質素，手掌咁大嘅美國生蠔，我都係第一次見！少有地要分3啖食，勁！！

注重儀態嘅可以揀返d 細嘅黎食。美國蠔海水味濃，略帶甜味。如果鐘意食甜一d嘅可以揀細隻一d嘅日本蠔，the Luxe 都有供應架，不過我口味就比較獨特，偏偏就係鐘意海水嘅腥味～

另外，就到周家二小姐嘅至愛－三文魚刺身。見到妹抱住一盤魚生返黎個陣，我心感奇怪，明明頭先巡視個陣唔見有魚生架，噢，原來魚生同蝦係放同一個位置輪流上嘅，唔奇得我睇唔到啦，呢對鬼眼！！

（拼得靚靚留比相機食先）

另外，有一點不得不讚，有客人用錯夾去夾熟食，職員9秒9叫停，仲即時拎個夾去洗。好注重衛生，大酒店自助餐都未必有咁細心啦。

每次去食buffet 我都好期待salad bar, The Luxe 嘅salad 雖然幾好食，不過就真係少左d喎。

（妹：邊有人好似你咁淨食菜架！）

超，包都係我另一個主打，呢度有成5款包，仲要好軟身，牛油亦有適當地回溫，真係冇令我失望呀！！（我的另類自助餐食法～）

熟食一向都唔係我主打，不過 the Luxe 嘅熟食都有唔少選擇，同行朋友話buffalo wings 同有款雞都幾好食。呢個Omelette 人同相機都咁啱食！

主菜食飽 (妹：你好似只係食咗前菜），留返個肚食甜品，我都係甜品Killer!!! 估唔到呢嘅甜品都唔少選擇，當然試落晒啦，盡力啦！

揀咗呢幾款試，檸檬撻真係好好食，我encore咗2件，另外個兩個就一般般啦，brownie似mud cake多d，另外嘅pound cake外包pastry，感覺的確有d怪。

好surprise竟然有暖豆腐花食，我估係衛生問題，所以豆花係自助餐上好少出現。The Luxe 都幾大膽呀，不過佢咁fast pacing 都唔怕，眼見1個鐘已經換咗兩次，都唔怕丫。妹係豆花killer, 佢雙眼又發光啦。味道方面，不過不失啦，都夠滑嘅。

呢度都有我最愛嘅 Apple Crumble, d crumble 大大粒，好味又唔會太甜，仲用真蘋果肉，爽口嘅！不過放涼咗d，熱d 可能會好食d。美中不足 ...欠雪糕！係呢，呢度點解冇雪糕架，希望下次再嚟會有雪糕食啦！配埋Waffle 同心太軟仲正呀！！

今晚食得我地兩個好開心，短短40分鐘，有計劃，有目標，食到晒我地想食嘅野。Mission Complete! 好飽呀！！

下一站搵食姐妹去邊食好呢？

The Luxe Seafood Bar & Resto

地址 : 尖沙咀彌敦道63號iSQUARE國際廣場3樓301號舖

電話 : 2111 1184

網址 : http://www.openrice.com/hongkong/restaurant/-/445316

----------------------------------------------
Follow Me on Gi C Life
wengichow@gmail.com

-------------------------------------------

星期一, 8月 24, 2015

想食就食，食得出儀態嘅位元堂唧唧龜苓爽

話說，成日都聽到 "你呢個鬼妹仔，都食龜苓膏嘅咩？" 係呀，呢個咪係比王生影響下不思議事件之口味突然轉變囉！

ps,我仲train 緊自己喜歡綠茶食品

Anyway, 每2星期都會買一次龜苓膏食，清一清熱，對皮膚好腸胃又好。其實坊間一盅龜真係好大，代一餐或tea break食份量就剛剛好，少食多餐先係王道！不過有時plan 定咗某日龜苓膏下午茶都因為忙而冇辨法坐定定咁嘆。

好啦，今次有好野介紹，位元堂出咗飲品包裝龜苓爽，仲要係唧唧袋，出街時食又得，啜住開會又得，方便又乾淨，飲比食來得優雅吧！

坊間都有不少同類嘅包裝龜苓膏，其他牌子嘅會將龜苓膏打碎，所以啜嘅時候，似係飲緊糖水多過食龜苓膏。本身以為位元堂嘅都係相同嘅產品，點要一啜，依，啜唔到野嘅？再大力d 啜，嘩，成口都係龜！八卦好奇心態緊係即刻剪開包裝，倒出嚟嘅係一大塊龜苓膏！！！今次唔係飲糖水啦～正喔！

亦都因為呢一大塊龜苓膏，我可以講，啜係真係唔得，唧入口啦，話晒人地真係叫"唧唧龜苓爽"，用啜... 攰死你啦，一陣啜到面大唔好怪人～哈！

唧唧龜苓爽有兩款選擇，原味帶有輕輕甜味，不嗜甜嘅朋友就啱晒。

略嫌原味龜苓爽唔夠咬口，可以揀粒粒椰果配方，加埋椰果好爽口。同樣都係微甜，正～

睇埋標籤先，熱量唔係太高，而一包有22.5g糖 (即5匙）以甜品計都唔算太高，可以係飯後甜品嘅其中一個選擇呢！唧唧龜苓爽喺惠康有得賣，一經過就買定幾包看門口，又方便食又方便買，人生不就是太方便了吧！！！

----------------------------------------------
Follow Me on Gi C Life
wengichow@gmail.com

-------------------------------------------

星期四, 8月 20, 2015

Be myself 外內在美的結合 SKII R.N.A Power Change Destiny

神級護膚品牌SK-II有邊個唔識呢，不過講真，做咗9年Blogger，真係未認認真真地花上時間同呢個神級品牌好好相處過。記得較年輕嘅時候用過一次，到依家開始踏入成熟年齡，自覺是時候好好改變一下，Change Destiny!

攰！係呀，呢排工作真係好忙，但極忙都要衝著來會一會呢個小紅瓶，全新R.N.A Power系列！

講起上黎，以前對SK-II並無咩渴求，一直都抱 "搵到啱我用嘅護膚品，用得好好地就唔大轉lu" 呢種心態。但近年開始發覺老態開始出黎架，整體睇上去其實都冇乜咩，但只要細睇一d，開始發現皮膚好難再似以前咁光透，疑似的包包面應該係皮膚緊緻減弱，眼袋都越黎越大啦...

而我嘅一班台灣朋友，個個都食過防腐制咁，原來都係SK-II多年用家。引得我今日再忙都要黎呢個gathering，了解下SK-II 最新抗老之作- R.N.A Power Series

[全方位立體緊緻抗老巔峰次作驚世登場改寫肌膚未來15年命運] 👈🏻 呢個tag line，真霸氣！！

霸氣呢d嘢，緊係即直示範最實際架啦。即示範左呢個test, 利用一d吸水特強嘅棉，分別注入水、其他品牌嘅Essence A 同 R.N.A. Power Essence。樣本放咗幾日，水同Essence A 已經乾晒冇晒彈性，唯獨是R.N.A. Power Essence 嘅棉粒仲係軟棉棉有彈性。呢d真係冇的呃！

配合按摩手法，令皮膚吸收得更好，效果事半功倍，好今日開始就用呢個手法試R.N.A Power，呢半年積落黎嘅倦容，應該可以好快抺走晒架！

https://www.youtube.com/watch?v=Hx_GH5pJ-Kk

仲要多謝今天晚上嘅guest speaker-金牌Blogger經理人。做blogger，其實唔係自己個人嘅事，我地嘅小分享，的確係多多少少影響到睇我地嘅人，雖然我並無想過要以做blogger為職業嘅目標，但你今日嘅分享，等確比咁作為PR Marketer嘅我好多想法同動力呀！

外表，配合內在自信... 我相信 Be myself、Change Destiny！

----------------------------------------------
Follow Me on Gi C Life
wengichow@gmail.com

----------------------------------------------

星期一, 8月 17, 2015

從新認識，Bio Oil的13種用法，你中咗幾多樣？

對於Bio Oil，每次我都會來一個想當年... 呢個"想當年"嘅故事都好耐冇講過啦，因為依家跟本就唔會有人唔知Bio Oil 係d 乜，我亦唔再需要作詳細介紹或真實用家分享啦。

說來話長，如果大家對我認識深，大概都知我肚皮上有條6吋長嘅疤痕。係因小時一個大手術所至。一個病無奪取我嘅性命，但就將我由一個120磅嘅肥妹仔變成90磅啱夠嘅排骨。及後，湊大我嘅嫲嫲先我瘦成咁，心痛下將我係3個月內再谷返上130磅... 難以想像...

(今日呢一個身段，係我千辛萬苦keep 出黎架。）

肥-->瘦-->肥事發不過半年，你可以想像我嘅皮膚有多難受嗎？橙皮紋生到全身都有，大腿、patpat、連腰同胸都有，腰間嘅紋，我可以用沙漠紋黎形容。

呢半年催谷得咁厲害，原因係我要到澳洲讀書，愛孫心切，嫲嫲呢個舉動可以理解嘅，但就留下咗永不磨滅嘅烙印。好在，我識到一班好同學，佢地嘅媽咪都好鐘意我 (我成日都覺得係因為當年南澳華人少，佢地見到我覺得好新奇好得意 XDXD) 有位係醫院工作嘅媽媽送在支Bio Oil 比我，於是我日擦夜擦，橙皮紋終於減淡咗，胸係完全無晒，膝蓋都變淡左好多，唯有大範圍嘅地方如腰同pat pat，到依家仍隱約可見。

當年因為只係一名留學生，買一支Bio Oil 對我黎講都真係幾重皮，加上Original size 只有125ml，每日兩次全身查，2個星期就會K一支，真係唔太好意思又問朋友媽咪攞，所以去到咁上下，我就停用咗啦。不過如果唔係Bio Oil, 深信我今日會無自信著Bikini。

回港後，每次妹妹回來渡假我都會託佢帶一支125ml 返黎，細細支唯有慳住用。去到幾年前香港終於有得賣，定價仲要唔係貴 (HK$180)。而時至今日，Bio Oil 亦推出咗200ml (HK$250) 大支裝啦，唔洗成日入貨，感覺冇咁惡啦！

呢日出席Bio Oil嘅gathering，令我重新認識呢位老朋友，以前只知道佢有幾好，但好嘅原因一概唔清楚，今日終於知道原來入面除咗有專利成份外，仲有金盞花、洋甘菊、薰衣草同迷迭香。作為一個香薰治療師，一睇就知呢幾個油就係對付受損皮膚嘅神油，由修復、抗敏、鎮靜、去收緊。另有Vit A 同 Vit E，改善暗啞，明亮膚色。我到今日先知，原來我一直用緊d 咁滋補嘅嘢！haa，後知後覺添～