G for Gi: 好好愛護你的眼睛(上) ～H2O+ Advanced Collagen Green Tea Eye Treatment

星期二, 12月 27, 2011

好好愛護你的眼睛(上) ～H2O+ Advanced Collagen Green Tea Eye Treatment

你認為面上最脆弱既係邊一個部邊? 對於我，就必定係眼週肌膚。
有鼻敏感既朋友仔就最明白架啦，只要一轉天氣，眼又痕，鼻又痕，眼水不停流。
以前認識有幾位朋友同樣有鼻敏感問題，眼下同樣有對又黃又乾既眼圈。
淚線敏感，眼水令眼周肌氧化，容易變得又黃又乾。

阿Gi自小就以此為戒，小心處理眼周肌膚。
家中眼霜只有多永無缺，有時間仲會自己研究下DIY.

幸得PR邀請，今日黎到~H2O+ @屯門tmt plaza 體驗～H2O+ Advanced Collagen Green Tea Eye Treatment。
係咁乾既天氣下好好為眼睛護理一下。

不得容，容不得！阿Gi竟記錯時間遲大到！

好在店員人好好的，冇cancel 我既appointment, 亦冇對我語氣差或草草招呼我，仲答左我好多問題tim。
以前常光顧海港城店都已經feel到~H2O+店員個份親切，今天係tmt plaza 同樣感覺到呢份恩勤。

先黎皮膚分析。下巴，面，眼，額。星星紋越分明即角質層排列越好，皮膚鎖水度越高。
對上一次做同類型既皮膚測試應該係3年多前。
當時店員睇到媽媽聲不停問：你咁細個攪乜你啲皮膚乾成咁? 鎖水能力又差。乾紋都已經跑出來了!
哈，事隔3年。

今日，顧問不停講既反而係：你啲皮膚真係唔錯wor, 係好好至啱，啲星星紋幾明顯，排列又整齊，
係眼肚差小小，毛孔細又冇色斑。下？你以前皮膚好差？咁你做過咩黎呀?
哈哈哈！"...心花正怒放，春風給我按摩..." 我真係為左我呢塊面苦心經營左好耐同付出好多架。

入房了，唔講唔知原來每間~H2O+店內都有間小型美容房。
客人可以選擇係店內做護理或去Oasis spa。真係方便。
只係有小小嘈，因為格離就係餐廳，阿gi不停偷聽格離啲廚房佬講野。哈，其實係聽唔到架。哈哈哈！

護理開始，Step如下，
其實淨做eye treatment 我都係第一次，原來係咁既！估唔到會做得咁仔細。

Step1 : 卸妝 - 雖然我只畫了眼線，美容師都超級有心地為我卸妝，仲要卸得超級乾淨。
其間不停問我有冇唔舒服。果真細心！

Step2: 潔面 - 別以為做 eye treatment既面上問題美容師就唔多理。

今天，就在短短5分鐘內，我洗了兩次面！仲要係很仔細的洗！

Step3: 上toner. 同樣，雖然係做eye treatment, 但面上都會照顧周到。
上toner 時我叫左一句: 很熟悉既味道!
原因係，我呢個祖祖死硬fans細個時扭媽咪買祖祖代言既H2O+比我用。
全套基本護理我都有齊架！

前3steps中，同美容師Chris有傾有講。之後佢就無撩我講野lu. 加因我要休息啦! 我欣賞呢點，因為我最怕預到太多野講同太冇野講既美容師架啦!

Step4: 按眼仔 - 超超超舒服，最鐘意按面按眼。
力量很好。加上美客師係用精華黎按而唔係用油。太好了，我真係好易生油脂粒！好舒服，好手勢，唔馬夫！
Chris 仲話我對眼好dry，吸晒啲精華。就精華我都加左幾次=P

Step5: 敷eye mask, 明明就係同家一款green tea eye mask。點解敷時個感覺同係屋企敷咁唔同既？
係屋企敷唔夠5分鐘，眼膜就已經乾晒，仲要粘很好實。點解依家又唔會既？
都係因為我對眼太乾，將D精華吸晒。Chris 教我係敷眼前用精華按眼，幫助眼皮吸收精華之餘亦可舒緩眼睛疲勞。