又到端午節，又有粽食啦！咸肉粽個d喺粥鋪日日都有得食啦！ 過時過節緊係要試d特別d！
今年WeShare 為食兵團， 我就代表品評一下美心客家土魷粽，再私下同KIRA交換咗嘉興粽，為食嘅我地就可以一次過試晒兩款啦～呵呵～
ps. 經歷過舊年切爛咗隻粽攪到影唔到相，我今年真係小心咗好多。不過美心嘅粽都實在太足料，今次都仲係切得樣樣衰衰咁, sigh!
一切開，大大塊土魷急不及待要擁出黎，就表面睇就已經feel 真係好足料咁播！
先試一口土魷。
平時最多食土魷都係蒸肉餅個陣，𠴱d 土魷又乾又硬令我對土魷嘅印象真係麻麻地。
當然兩樣嘢唔同又唔多可以咁去比嘅～哈哈～
呢啖土魷唔乾唔硬之餘仲好入味，不過略嫌少咗一份爽口感！
同一size 嘅土魷，一隻粽入面起碼有成3﹣4舊，果真足料呀～
重有好多蝦米同花生～ 蝦米花生嘅份量多到係平均每一啖都有。
所以呢，米睇個粽白雪雪說以為佢冇乜味，其實啖啖都原汁原味～
足料嘅定義係乜？除咗有好土魷、花生同蝦米，一隻粽入面重放咗成兩粒栗子咁多。
包過粽就知道，要包一個咁多料嘅粽係幾巧功夫嘅事！
美心客家土魷粽評分
包裝：3 / 味道：4 / 足料：5 / 創意：4
喜歡重口味嘅，可以試一試嘉興粽。相比下，嘉興粽比土魷粽更香口，更特別～
嘉興粽外表同台北粽一樣，都係啡色嘅，燸米先同醬油炒過，淨係個燸米返已經好好食，加上粽入面有一大大大塊以上海醬油醃製腩肉，真係好大塊，腩肉汁入晒個燸米飯入面，超香口，王生一句：怕肥抵死後，就將一大啖粽放入口！！
ps, 有人入夜狂操，超，你咪又係怕肥！！
腩肉外仲有冬菇，但只得一舊有點可惜。
蛋黃哥蛋黃哥！！食粽冇蛋黃真係好似差d 咁，難得嘉興粽仲有2大粒咸蛋黃，share比我個土魷粽～ 不過嘉興粽本身已經好重口味，仲要加埋2粒咸蛋黃，好似真係濃咗d咁呀。
總結：
自上年試過台北粽之後開始對美心家鄉粽系列，今次第一次試客家土魷粽，味道唔重好啱我！每一啖都會食到好香蝦米味，土魷一d 都唔硬，仲有大大粒冬菇同栗子，果真足料～
本身個糯米飯味度唔濃，睇黎係有炒過，所以個飯己經好香，再加埋d 料已經好夠味。
另外，都想講一講個冰袋。師奶仔就留意到今年美心冰袋唔同咗，你地覺唔覺？
左邊係舊年個冰袋款，粽同月餅都係用呢款嘅，右邊就係今年款，大就係大d，不過……
封口位就差好多，兩款都係同魔術貼，但舊年嘅就係對摺密封，今年嘅就多咗一塊蓋，但係唔密封架，旁邊大大個窿，咁點保溫呀！！！
----------------------------------------------
Follow Me on Gi C Life
wengichow@gmail.com
沒有留言:
張貼留言