農曆7月忌搬遷?? 介紹屎上最神既甩底搬遷公司及地獄最強既寬頻公司

GI自小就信穌哥, 對風水命理星座都係得個知字就算.

所以對身邊友人不停同我講 吓~農曆7月, 你搬屋呀?

我只係好衷心咁講句 多謝關心 頂多都係講多句 係呀, 趕係農曆14號之前呀 令家中既老人家安心.

我以下既分享, 你睇完之後可能會話 GI呀, 不得不信邪 但樂天派既我就覺得 好在有天父照住我

(呢頭話完自己係樂天派, 個頭就黎投訴+鬧爆人啦)

 

WARNING

以下內容含極多字及極大負能量.

有決心人士敬請將內容看完.

嫌我長氣既可以直接睇戲肉SESSION.

 

話說, 住左係舊有既位單都有11個月 (去年9月尾搬入既)

其實呢個單位無論係景觀, 坐向同SIZE都好正, 真係有一刻想問業主會唔會賣..

 

可惜住左3個月後,開始諸事不順.

先係不停身體不適, 男人重入埋廠.

自己家中發生好多事, 迫到我要作出一個有可能影響我一生既決定.

無端端又會有好多無謂+多餘既金錢支出.

工作不順, 好多眼淚同嗌左好多無謂既交.

黑仔野係接二連三, 獲獲新鮮獲獲甘, (起碼冇死人冇重病, 謝天謝地..)

又正值租金低左d, 業主又冇左影.

所以決心轉下環境, 係同區搵另一個單位..

 

終於搵到新地方… 可惜簽左約之後就怪事重重.

先係業主交樓冇帶key =.="

跟手就係發現牆身好多蟲.

好多野如燈呀門鎖呀都突然壞晒...

記得睇樓當日, 我係煮到一半飯走去睇, 又下大雨, 自己個心又唔想搬, 唔想理.

所以好心急咁睇一睇就走左, 可能真係之前睇得唔夠清楚啦…

咁多野要去處理, 個人開始好stress, (又唔知點解成日無啦啦喊, 好似中左邪咁.)

 

新業主好好人咁話 你地放心去攪啦, d$$係租度扣, 比多3日免租期你地啦.

Wow~~ 看見曙光喇, 即去攪pest control 同搵人整鎖整燈.

 

所有野都攪掂晒, 開始要執野打掃既時候,

一向都唔OT既男人係搬前既一個星期日日都要OT到11點幾.

唯有自己一個執, 搬, 抹.. 點知扭親條腰, 坐都坐唔到.

臨搬既前一晚, 男人講左一句話…

住左係度黑足成年, 到要搬走啦, 點解D黑氣都死要纏住我地…

當時我冇在意佢講既說話, 只係望住個海, 睇住青馬熄燈, 好感慨, 唔想搬, 因為真係好鐘意呢間屋.

感覺似比鬼迷, 係咁諗住唔想搬, 唔想搬…

眼淚, 又掉下來了..

 

<<唔好意思, 講左咁多依家先至係戲肉>>

烏鴉咀講中黑氣真係死要纏住我地唔放

事件1: 搬屋公司甩底

今次唔開名都唔得~ 甩底公司叫 “搬X易搬運公司”

我XX佢丫, 一D都唔易.

一早約好左28號一早9點搬. 電話都冇個黎.

我打比佢, 佢地先至話之前個單DELAY左 要2點先黎到.

好, 到1:45, 我再打比佢, 佢又話架車死左, 要夜晚先黎到.

唔該啦, 如果佢地係專業既, 都知珀麗灣4點後就唔會比車入, 夜晚點搬呀. (我係堅有咁同佢地講返)

我唔理啦, 叫佢地CALL 街車入黎又好, 坐公車入黎都好, 總之4點前同我死到入黎.

點知佢居然答我 小姐你介唔介意過2日先搬 佢真係以為我好恰, 即時醒左個流星拳比佢嘆~

望一望錶已經3點, 我知唔可以再靠佢地, 即時上網搵搬屋公司. 好擔心…

 

幸好都只係打左3個電話, 就已經有公司肯飛車入黎. 收費都係公價, 不過只係幫到我地搬D 大件野 (都好啦, 人地唔食飯都幫我搬, 又冇坐地起價. 好在搬得近, 其他都可以自己搬) 呢間野真係好掂, 只係用左1個鐘左右就幫我拆裝好晒幾件大傢私, 重要裝得好實淨, 位置亦幫我移好. 又好禮貌. 想表揚下佢地. 以下係聯絡方法

飛越專業搬屋公司
電話 : 61500885 謝先生

網址 : www:feiyue.com.hk

第一日完…

 

事件2: 地上最強既網X行居然搞錯ORDER

2個星期前已經約好左網上行既搬遷服務, check 好晒有coverage 同有30MB 既用戶port.

29號早上, 師父準時到左, 佢有佢攪, 我有我執野.

整左20分鐘, 見師父不停搖頭, 一問之下, 佢話我用開個modem 唔啱, 要換過另一個, 轉頭再返黎.

換好後, 師父仍然接唔到上網. 之後師父滴晒汗咁問我 小姐你係唔係姓蔡架? hmm.... 唔係(汗) 咁你應該唔係深水步搬過黎架啦. 我估sales 落錯左order. 將另一個account 搬左過黎…

唔係卦. 咁都得… 我即打去hotline 了解清楚. Sales 亦承認係落錯單, 要翌日先可以再叫師父上黎.

過左半日, 我再打去confirm booking, 同時揭發左原來大廈跟本只得6個port, 6個都full左. 要到9月30日先可以幫我開戶. @#$@@%@##*&@#$!!!!@#@@$! 跟本就唔係佢地所講既落錯單!!!!!

Sorry, 我唯有堅持終止合約, 比生意人地做… 期間都同佢地嘈左好耐...

 

成個weekend 我都興到火屎, 不過總算settle 晒, 希望d黑氣唔好再纏住我啦.

搬定左新地方感覺都幾好, 地方冇之前咁大, 不過就好夠用. 反而覺得以前有小小過大tim.

直覺覺得新屋都旺旺地, 至小冇令我變地獄黑仔王丫. 再衰都有一線曙光, 最緊要都係有天父照住者~

 

多謝大家睇我發盧蘇, 感激! 感激!

 

送幾張新屋相及貓貓figure相 (係床櫃底搵返出黎)比你地睇丫~