G for Gi: 5分鐘快速上班妝

星期日, 9月 13, 2015

5分鐘快速上班妝

係咪常常都會諗，阿Gi明明係返朝9嘅OL，點解可以堅持到每朝起身跑步，跑完仲有時間沖涼化妝返工？

堅持呢家嘢我都答唔到你，因為平時我係一個3分鐘熱度嘅人，連我自己都覺得好神奇。至於化妝返工，我就真係好快手，20分鐘我就可以沖完涼攪掂成個人出門口。化妝？只需5分鐘～

報告一下我每朝嘅行程先...

0530 起身

0620 出門跑步

0700 返屋企，預備老公早餐

0710 沖涼換衫化妝吹頭

(20分鐘開始計時）

0730 陪老公食早餐

0740 出門

沖涼換衫用10分鐘，化妝吹頭10分鐘，每日都係同一個practise, 其實真係好快手。Share 下我呢個5分鐘嘅妝先！

底妝：有色防曬 / bb cream / 礦物粉

Gi家中絕無粉底液之類嘅朋友，我唔鐘意塗粉底，因為我成日抓面申鼻抺汗，好怕d指甲圍粉邊，又或抺出粉色紙巾，好尷尬，所以平常都係用有色防曬或bb cream就算。

如果個日要見人，我就會用礦物粉，對皮膚嚟講冇咁大負擔呀。Bare Minerals 嘅粉底出名有修護作用，我用緊嘅呢個仲專係為失調肌膚而設，預防暗瘡粉刺。仲有茶樹油同蘆薈成份，就算皮膚損咗或出緊暗瘡都可以用，粉底幫手消炎嘅粉底！

Blemish Remedy Foundation 礦物抗炎零毛先粉底 $250

講到茶樹，除咗消炎外，控油都係一大好處，我嘅皮膚比較乾，平日唔化妝嘅日子，係office半日左右，額頭T位就會開始出油，乾得濟呀！用BR粉個日就可以放心啦，茶樹控油蘆薈補濕，全日都冇乜油出，皮膚唔乾，出少d油，毛孔都自然會細d啦。我都係一個懶人，冇補妝，不過都keep 到下架。

Seamless Buffing Brush 無痕順滑粉底掃 $215

礦物粉都係用掃上會long last d, 掃可以將粉帶入皮膚不平表面，遮蓋毛孔。礦物粉分子特別細，所以唔怕塞毛孔。特別講一講，呢個掃真係好好用，佢嘅毛好柔軟唔拮皮膚，加上佢好易沾粉，又唔會散到周圍都係。另外佢嘅毛長度啱啱好，打圈上粉好方便，細微位都上到。以前用過好多唔用嘅礦物粉掃，一不就係毛太長打唔到圈，一係就唔掛粉，一掃d粉就彈走晒。呢個掃真係幾好，手柄仲好好握添！又靚！